´t Begôs allemaol in 1970 toen KEN vûr d´n iërste kiër meideej as groep mèt d´n optoch in Bree ûvver de zweigplich van de gemeinte-ambtenare. We heijje allemaol de mônk dichgeplèkt en heijje heej zoëvuul succes meij dèt weej ´t jaor daonao direk dreej wages ginge bouwe. Daovûr heijje we ´nne ganse hook aafgeheurd in de tuinbouwloods. ´t Jaor d´rop heij ´t Kerraad de ganse loods aafgeheurd en hebbe weej maar wèr as groep meijgedaon. Dao heijje we trouwes gènne spiët van , want dèt jaor wônne weej de perspriès mèt "Weej gaon nao Balder". Ùvver de foto in de krant woe we opstônge mèt ´n plank vûr de kop en ´n gaasmasker op hebbe we flink gèt kommentaar gekrege en ´t waas hiël gek, maar ´t meiste kommentaar kwaam toendertiëd neet oët Bree.

 

 

In 1976 heij ´t Heeske ´n Vreejstaat oëtgerope en heije ze alle toegangsweeg aafgezat mèt slaagbeum. Dèt waas vûr KEN ´n gemèkkelik jaor. We hebbe toen zônne slaagbaum geschoept en dao mèt meijgelaope in d´n optoch. ´t Heeske heij dae middig de motorzaag meigenome ûm te probere dae baum in stukke te snieje. Maar dao ware weej wal op beraekend, want we heije de ganse baum veurzeen van kettinge.

In 1977 heijje we s´woensdigs vûr vestelaovend nag gèn idee en heijje we de mood al has opgegaeve toen d´r donderdigs inèns ´n stûk in de krant stông ûvver appelesiene die vol kwik zootte. Dus weej ´nne kale baum op de wage gezat en s´zaoterdigs nao Vènnel nao de mèrt. Weej krege dao nag geld d´r beej oët as we de appelesiene maar meijnome, want die woorte ze dao nag nimmer aan de straotstein kwiët. Dees appelesiene hebbe we toen allemaol in dae kale baum gehange. Verkleid as sjeik hebbe we toen alle appelesiene volgespote mèt kwik en ze in d´n optoch oetgedeild. We kôste ´t gewoen neet beejhaoje, zoevuul vraog waas daoveur. ´t Patent van ´t oetdeile van appelesiene hèbbe we dèt jaor verkoch aan d´n Hab, die dèn ôk vanaaf daen tiëd illik jaor dees traditie hebbe veurtgezat ... wal zônger kwik d´r in.

In 1983 heij de gemeinte Bree diverse huus gerenoveerd en hebbe we oet de container 11 WC-pût en stortbèk geliënd en die op de wage gezat, ôs zelf d´r op gezat, un bord gemaakt mèt "Kiek gauw want weej trekke door" en ôzze waage waas wèr geslaagd.

De groëte doorbraak vûr KEN kwaam in 1985 mèt de Superheffing. ´n Groète koe op de wage en die mèt alleman ophuffe bezorgde ôs vûr d´n ierste kier d´n ierste pries. In dèt jaor waas Wielke aan ´t buutte op Curacao en woejje ze ûm laotte weite dèt ze d´n optoch gewônne heijje. Allein, ze steurden ûm ´n gewoën telegram. De vrouw woë Wielke in hoës waas is de ganse daag euver ´t eiland gereeje ûm Wielke en Mia te zeuke, want die dach dèt d´r gèt ernstigs gebeurd waas. ´t Is namelik gebroekelik in ´n ver lank dèt beej ´n good berich d´r altiëd ´n gelukstillegram gesteurd wuurt. Dus zeej reep Wielke en Mia in de naomiddag apart um heur ´t slechte niejs te euverhandige en ze snapte d´r niks van dèt Wielke begos te juiche toen hae dèt tillegram gelaeze heij.

 

 

In verbank mèt ´t slechte waer in 1986 hebbe we allemaol hôngspèk gemaakt, zien in ´n hongsrèn oppe wage gaon zitte en hebbe ´t hôngswaer oetgebeeld. Dees pèk waere nôw nag illik jaor oëtgeliënd. Dao haet zellufs Viaduct zien ierste succes mèt gehaald in d´n optoch. D´r woort toen wal miër ûvver de pèk as ûvver de groep gepraot. ´t Oetbeelde van Celle te kort vinge weej zellef nach ein van de leukste ideeë die we in d´n optoch gehad hebbe. Weej deeje toen nèt of d´r wal genôg celle ware, maar dèt die allemaol te kort ware. (kiëk maar op de foto).

In 1990 heij d´n Hab gekoze vûr ´n thema in d´n optocht, namelik ´t 750 jaor bestaon van Bree. Dus ginge weej ech truuk in d´n tiëd en zien we op un ossekèr as oerminse meijgetrokke. We heije ôs hiel groëte oere laote aanneije beej Jan van de kapper en mèt succes want we woorte iërste, maar ja ´t spraekwoort zaet neet vûr niks "groëte oere vange hoëge prieze"!

Toen Kesje Prins woort (in 1991), hebbe we alles op ut lètste moment nach ûm môtte gôjje. Toen môste we nag ´n meule in Paries gaon hale en nach via unne spoedkursus danse gaon liere. Maar smandes ware we in vol ornaat rônk ûm de Moulin Rouge de KEN-KEN aan ´t danse! En, zoeas ôs spraekwoord zaet "met de KEN-KEN wuurse altiëd iërste"!

In 1993 waas d´r sprake van dèt de Rabo-bank in Bree wèg ging en beej Panningen kwaam. Volges welingelichte bronne kwaam dèt zeker s´woenzigs vûr vestelaovend in de krant. Heejdoor vônge weej dit ´n Ster-idee ! Allein swoenzigs stông d´r niks in de krant en heije weej de wage al klaor. Toen hebbe we ûnne ganse aovend rônk ûm dae wage gelaope en ôs rot geprakkiseerd wat weej dao zônger vuul werk van kôste make. Nao zes bèk beer ging de kogel dôr de kerk en waas ´t ôs loët òm oad ièzer en hebbe we ´t euver ´t schûttersloëd gedaon, compleet mèt keuning en keuningin (mèt blomepûtje). En toch nach d´n twèdde priës gehaald.

Vanaaf 1970 toët 2000 onaafgebroke 30 jaor meijgedaon en in totaal neet miër as 30 waeke d´r aangebouwd, want ôs motto is altiëd gewees dèt we ein waek vûr vestelaovend pas beginne te bouwe.Weej hèbbe wal ût gelûk dèt we binne KEN ´n groëte loëds en ´nne kleine tòmmerman toët ôs beschikking hebbe. Praalwages hebbe we noët gebouwd. Humor steit beej KEN altiëd veurop en ´t spel oppe wage greujt altiëd tiedes d´n optoch.

De komende 15 jaor waere vûr ôs ût moeilikste mèt ût wages bouwe. Daonao kriege we d´r allemaol wèr gèt miër tiëd vòr en misschien gaon we den in 2016 wal ´nne kiër ´nne praalwage bouwe.